اسلام آباد (مانیٹرنگ ڈیسک /این این آئی )چینی سفیر نے کہا ہے کہ پاکستان میں 25بلین ڈالر کی سرمایہ کار ی سے سی پیک کے 46منصوبے مکمل ہو چکے ہیں ، پاکستانی کی معاشی اور سماجی ترقی میں اہم کردار ادا کیا ہے۔باہمی کوششوں سے سی پیک کے 46 پراجیکٹ مکمل ہوچکے ہیں
اور کچھ زیر تعمیر ہیں جن پر اب تک 25اعشاریہ چار بلین امریکی ڈالر خرچ ہوچکے ہیں ۔تفصیلات کے مطابق پاکستان اور چین کی دوستی کے 70 سال مکمل ہونے پر سیمنار سے خطاب کے دوران چینی سفیر نونگ رونگ نے کہا ہے کہ سی پیک کے منصوبوں کے تحت 75ہزار بے روزگار افراد کو روزگار فراہم ہوا ۔ ملک میں کورونا کی بگڑتی صورتحال کے باوجود سی پیک کے دیگر منصوبوں پر تیزی کیساتھ کام جاری ہے اور اس پراجیکٹ میں کام کرنے والوں کو نوکری سے نہیں نکالا گیا ۔ گوادر پورٹ کی کامیابی کو وزیراعظم عمران خان نے بھی سراہا ، بجلی کے منصوبوں نے ملک کی لوڈ شیڈنگ جیسےمسئلے پر قابوپانے میں مدد ملی ہے ۔ سی پیک اب ایک نئے مرحلے میں داخل ہوچکا ہے۔دوسری جانب آرمی چیف جنرل قمر جاوید باجوہ سے چین کے پاکستان کیلئے سفیر نونگ رونگ نے ملاقات کی ہے ۔آئی ایس پی آ رکے مطابق جی ایچ کیو راولپنڈی میں ہونیوالی اس ملاقات میں باہمی دلچسپی کے امور،دفاعی تعاون،سی پیک پر پیش رفت اور علاقائی سیکورٹی صورتحال پر تفصیلی تبادلہ خیال کیا گیا ۔چینی سفیر نے خطے میں امن و استحکام کیلئے پاکستان کی مخلصانہ کوششوں کی تعریف کی ۔انہوںنے اس عزم کو دوہرایا کہ چین بطور سٹرٹیجک شراکت دار پاکستان کی معاونت جاری رکھے گا ۔ڈائریکٹر جنرل آئی ایس آئی لفٹیننٹ جنرل فیض حمید بھی ملاقات کے دوران موجودتھے ۔
