لاہور(این این آئی ) پنجاب بھر کےسرکاری کالجوں کی خواتین اساتذہ کی گریڈ 20 میں ترقیوں کا معاملہ، سینیارٹی نمبر 102 تک اساتذہ کی ترقیوں کے کیسز فائنل کر لیے گئے۔تفصیلات کے مطابق سرکاری کالجوں کی خواتین اساتذہ کی گریڈ 20 میں ترقیوں کے کیسز کو ابتدائی طور پر فائنل کر لیا گیا ہے،کالجوں میں تعینات 19 ویں گریڈ کی سینیارٹی نمبر 102 تک پرموشن کیسز فائنل
کیے جا رہے ہیں، محکمہ ہائر ایجوکیشن نے گریڈ 20 میں ترقیوں کیلئے کیسز تصدیق کے لئے ڈی پی آئی کالجز کو ارسال کر دیے ہیں۔ڈی پی آئی کالجز کی جانب سے جانچ پڑتال کے بعد اساتذہ کی ترقیوں کے کیسز صوبائی پرموشن بورڈ بھجوائے جائیں گے، محکمہ ہائرایجوکیشن 19 ویں گریڈ کی نئی سینیارٹی فہرست کے مطابق کیسز صوبائی پرموشن بورڈ کو ارسال کرے گا۔دوسری جانب پنجاب ایجوکیشن فاؤنڈیشن کے پارٹنر سکولوں میں نئے داخلوں کی اجازت دے دی گئی ہے، پیف کے بورڈ آف ڈائریکٹرز نے نئے داخلوں کی اجازت دی ہے، پیف کے پارٹنر سکولوں میں ایک لاکھ 25 ہزار نئے طلباء داخل کرنے کا اہداف دیا گیا ہے، پارٹنر سکولوں کو 31 جولائی سے 10 اگست تک داخلے کرنے کی اجازت ہوگی۔اس ضمن میں پیف حکام نے ہدایات بھی جاری کر دی ہیں۔پارٹنر سکولوں میں پہلی جماعت تا پرائمری تک طلبائ کے داخلے ہوں گے۔ پیف سٹوڈنٹس انفارمیشن سسٹم کے ذریعے سے طلباء کے داخل ہونے کی تصدیق 9 اگست سے شروع کرے گا.واضح رہے کہ پنجاب ایجوکیشن فاؤنڈیشن نیپارٹنر سکولوں کے صرف 25 فیصد طلباء کا کوالٹی
ایشورنس امتحان لینے کا فیصلہ کیا تھا، پیف پارٹنر سکولوں میں زیر تعلیم 27 لاکھ طلبائ میں سے 25 فیصد طلبا کا انتخاب کر کے امتحان کا انعقاد کیاگیا، طلباء کا کوالٹی ایشورنس امتحان تین شفٹوں لیاگیا،نرسری، پریپ اور پہلی جماعت کا امتحان زبانی اوردوسری جماعت سے لے کر دسویں جماعت تک کے طلباء کا تحریری امتحان لیاگیا۔
فیصل آباد سمیت پنجاب بھر میں امتحانات کا انعقاد 20 جون سے 10 جولائی تک ہوا، پیف نے پارٹنر سکولوں کے طلباء کے لئے امتحان کا دورانیہ ڈیڑھ گھنٹہ مقرر کیا گیاتھا،سکولوں میں زیر تعلیم طلبائ کا اردو، سائنس، انگریزی اور ریاضی کا امتحان لیاگیا تھا۔
