نیویارک (این این آئی)مارول سپر ہیرو ز کا مشہور فکشنل کردار بلیک پینتھر باکس آفس پر چھایا ہوا ہے، مزید گیارہ ارب اٹھانوے کروڑ روپے کما کر ٹاپ پوزیشن برقرار رکھی۔ریان کوگلر کی ہدایت کاری میں بننے والی فلم بلیک پینتھر میں مرکزی کردار اداکار چیڈ وِک بوسمین نے ادا کیا ہے ،فلم کی کہانی ایک ایسے بادشاہ کے گِردگھوم رہی ہے جس کی سلطنت میں خانہ جنگی کا آغاز ہو جاتا ہے ۔

اپنی حکمرانی برقرار اور سلطنت کو بچانے کے لیے کنگ بلیک پینتھر کا روپ دھار کر سی آئی اے ایجنٹ اور سیکورٹی فورسز کی مدد سے اپنے دشمنوں کا خاتمہ کرنے کیلئے اعلانِ جنگ کر دیتا ہے ۔فلم بلیک پینتھر اب تک چھپن ارب روپے بٹور چکی ہے ۔اسی ہفتہ کے آخرپر ریلیز ہونے والی فلم ریڈ اسپیرو ایک ارب 28کروڑ سمیٹ کر دوسرے نمبر پر آگئی ۔فرانسس لارنس کی ہدایت کاری میں بننے والی اس فلم کی کہانی ایک ایسی روسی خاتون جاسوس کے گرد گھوم رہی ہے، جو ایک سی آئی اے ایجنٹ کی محبت میں گرفتار ہوجاتی ہے اور ڈبل ایجنٹ بننے پر غور شروع کردیتی ہے۔فلم میں اداکاری کے جوہر دکھانے والوں میں ہالی ووڈ کی معروف اداکارہ جینیفر لارنس ، جوئیل ایگرٹن اور بِل کیمپ سمیت دیگر اداکار شامل ہیں۔ایکشن سے بھرپور نئی ڈراما فلم’ ڈیتھ وِش‘ ایک ارب 44کروڑ روپے آمدنی کیساتھ تیسرے نمبر پر رہی ۔ایلی روتھ کی ہدایت کاری میں بننے والی اس فلم کی کہانی ایک ایسے شخص کے گرد گھوم رہی ہے، جو اپنی بیوی کے قتل کے بعد انتقام کی آگ میں جلنے لگتا ہے اور بدلہ لینے کے لیے نکل پڑتا ہے۔فلم کی کاسٹ میں ہالی ووڈ کے معروف اداکار بروس ویلس کے علاوہ ڈین نورس بھی شامل ہیں ۔