لاہور(نیوز ڈیسک)بھارتی اداکار رضا مراد اپنی اہلیہ , بیٹی اور بہو کے ہمراہ 11روزہ دورے پر واہگہ کے راسے لاہور پہنچ گئے ۔ رضا مراد اپنے دورہ کے دوران لاہور کے علاوہ کراچی اور اسلام آباد بھی جائیں گے۔ واہگہ بارڈر پر میڈیا سے گفتگو کرتے ہوئے رضا مراد نے کہا کہ ہمیشہ لاہور آنے کی خواہش رہی ہے اور تیسری بار لاہور آیا ہوں ۔ انہوں نے کہا کہ مجھے پاکستان آکر کبھی یہ محسوس نہیں ہوا کہ میں کسی دوسرے ملک میں ہوں ،پہلے دو دوروں کے دوران یہاں جتنا پیار ملا ہے اسی نے مجھے تیسری بار لاہور آنے پر مجبور کیا ہے ۔ رضا مراد نے کہا کہ اگر دونوں ممالک میں تعلقات کو آگے لیکر جانا ہے تو روابط کو فروغ دینا ہوگا اسی سے دونوں ممالک کے درمیان پائے جانے والے مسائل کو حل کرنے میں مدد ملے گی ۔ انہوں نے کہا کہ دونوں ممالک کے عوام ایک دوسرے کے ہاں آنا جانا چاہتے ہیں ۔ دونوں ممالک میں کچھ ایسے عناصر ہیں جو رکاوٹیں ڈالتے ہیں لیکن ان کی تعداد انتہائی کم ہے ۔ انہوں نے بتایا کہ پاکستان کے دورہ کے دوران لاہور کے علاوہ کراچی اور اسلام آباد جانا بھی شیڈول میں شامل ہے۔