بیجنگ(این این آئی) چین میں ہوا میں لٹکتی اور پٹڑی پر دوڑتی اسکائی ٹرین کا پہلا کامیاب تجربہ کر لیا گیا جو 60 کلو میٹر فی گھنٹہ کی رفتار سے چلے گی۔چین میں ہوا میں لٹکتی اور پٹڑی پر دوڑتی اسکائی ٹرین کا پہلا کامیاب تجربہ کر لیا گیا، ٹرین نے اپنا پہلا سفر 60 کلو میٹر فی گھنٹہ کی رفتار سے کیا جب کہ اس میں ایک وقت میں 124 افراد کے بیٹھنے کی گنجائش ہو گی۔ٹرین بنانے والی کمپنی کے حکام کا کہنا ہے کہ ٹرین اس لحاظ سے بھی منفرد ہے کہ اس میں لیتھیم بیٹریز کا استعمال کیا گیا ہے، لیتھیم بیٹری کے استعمال کی وجہ سے یہ ٹرین الیکٹریسٹی اور ڈیزل سے چلنے والی ٹرین کے مقابلے میں نہ صرف زیادہ بہتر کارکردگی دکھا سکتی ہے بلکہ ماحول دوست بھی ہے۔ حکام کیمطابق ٹرین کو مزید کچھ ٹیسٹ ڈرائیونگ کے بعد عوام کے لیے کھول دیا جائے۔
دوسری جانب یونان چین ثقافتی مذاکرات آج کل کے چیلنجز اور مسائل کا حل تلاش کرنے میں اہم کردار ادا کرسکتے ہیں ،چین اور یونان کے درمیان صدیوں سے تعلقات قائم ہیں اور مذاکرات کے ذریعے اپنے درمیان پید ا ہونے والے اختلافات اور چیلنجز پر بھی قابو پا سکتے ہیں ،یہ دو تہذیبوں کے درمیان تعلقات ہیں جو سچائی ، احترام پر قائم ہیں اور ہم ایک دوسرے کو سمجھتے ہوئے مشترکہ مسائل پر قابو پا سکتے ہیں۔ان خیالات کا اظہار یونان کے وزیر ثقافت ارسٹائلز بلتاس نے چین یورپ ثقافتی مذاکرات کے عنوان سے منعقدہ ایک فورم میں خطاب کرتے ہوئے کیا ۔ انہوں نے کہا کہ چین اور یونان کو جو عنصر آپس میں ملاسکتا ہے وہ ان کی تہذیب ہے جو صدیوں سے مشترکہ چلی آرہی ہے ، یونان ایک چھوٹا ملک ہے لیکن ثقافتی حوالے سے بڑا امیر ہے جس میں ثقافتی ورثہ کے حوالے سے چین کے ساتھ ہم آہنگی پائی جاتی ہے ،اس طرح دونوں ملکوں کے عوام ایک دوسرے کیساتھ تبادلہ خیالات کرسکتے ہیں ۔اس موقع پر خطاب کرتے ہوئے چین کی کمیونسٹ پارٹی کے سینئر رہنما لیو ین شان نے کہا کہ دونوں ملکوں کے درمیان اعلیٰ سطح پر باہمی مفادات اور احترام کے تعلقات قائم ہیں ، چین یونان کے ساتھ مختلف شعبوں میں کام کرنے میں دلچسپی رکھتا ہے ۔انہوں نے یونان کے صدر پروکوپس سے بھی ملاقات کی اور کہا کہ چین اور یونان کے درمیان گذشتہ چوالیس سال سے سفارتی تعلقات قائم ہیں اور دونوں ملک بہترین تہذیبی رشتوں میں منسلک ہیں ۔ اس موقع پر یونانی صدر نے توقع ظاہر کی کہ پیراؤس بندرگاہ کا منصوبہ چین یونان تعلقات کی بہترین مثال بنے گا ۔ چین یونان کا مخلص دوست اور شراکت دار ہے ، چین رہنما نے یونان کے وزیر اعظم سے بھی ملاقات کی ۔انہوں نے چین یونان تعلقات کو مزید فروغ دینے پر زوردیا اور کہا کہ چین یونان کے ساتھ تعلقات کو بڑی اہمیت دیتا ہے
