اسلام آباد (نیوزڈیسک)بلیک بیری کے چیف ایگزیکٹیو جان شین کا کہنا ہے کہ بلیک بیری اس سال درمیانی رینج کے دو اینڈرائڈ ہینڈ سیٹ متعارف کرائے گا۔ان میں سے ایک’ کی بورڈ‘ کے ساتھ ہوگا جبکہ دوسرے میں ٹچ سکرین ہوگی۔
بلیک بیری اپنے سسٹم بی بی 10 کے لیے ہینڈ سیٹ بنانے کا کوئی ارادہ نہیں رکھتا تاہم موجودہ آلات میں جدت کرتا رہے گا۔گذشتہ تین ماہ میں بلیک بیری کی فروخت میں 20 کروڑ ڈالر کی کمی آئی ہے۔ شین کا کہنا ہے کہ ان کا پہلا اینڈرائڈ ’دا پرِو‘ خاصا مہنگا تھا۔اگر بلیک بری کو ہارڈویئر بزنس میں رہنا ہے تو مناسن قیمت پر نئے ہینڈ سیٹ پیش کرنے کا خیال دانشمندی ہے۔
متحدہ عرب امارات کی ایک ویب سائٹ ’دی نیشنل‘ سے بات کرتے ہوئے ان کا کہنا تھا کہ مہنگا فون مارکیٹ میں لانے کا خیال شاید ایک دانشمندانہ قدم نہیں تھا۔انھوں نے بتایا کہ کئی گاہکوں نے ان سے کہا کہ وہ یہ فون خریدنا تو چاہتے ہیں لیکن سات سو ڈالر کی قیمت کچھ زیادہ ہے۔
اس سے پہلے شین نے کمپنی کی خراب کارکردگی کے لیے موبائل نیٹ ورک کے ساتھ مذاکرات میں تاخیر کو ذمہ دار ٹھہرایا تھا۔گذشتہ ماہ فیس بک اور ان کی وٹس ایپ میسجنگ سروس نے بلیک بیری کے لیے موبائل ایپلیکیشن بند کرنے کا فیصلہ کیا تھا کہ وہ بلیک بیری ایپ کو سپورٹ نہیں کریں گے۔بلیک بیری کا کہنا ہے کہ اس فیصلے سے کمپنی کو بہت مایوسی ہوئی تھی۔تجزیہ کاروں کا کہنا ہے کہ اگر بلیک بیری کو ہارڈویئر بزنس میں رہنا ہے تو مناسب قیمت پر نئے ہینڈ سیٹ پیش کرنے کا خیال دانشمندی ہے۔