ایک زمانہ تھا جب ویب سرفنگ کی دنیا میں مائیکروسافٹ کے براﺅزر انٹرنیٹ ایکسپلورر کا راج تھا مگر اب گوگل کروم ہر جگہ چھایا ہوا ہے اور یہی وجہ ہے کہ بل گیٹس کی کمپنی نے اپنے اس دودہائی پرانے براﺅزر کو ‘ قتل ‘ کرنے کا فیصلہ کرلیا ہے۔
اس بات کا انکشاف مائیکرو سافٹ کے مارکیٹنگ چیف کرس کیپوسیلا نے گزشتہ روز ایک تقریب سے خطاب کرتے ہوئے کیا۔
ان کا کہنا تھا کہ ہم اس پر تحقیق کررہے ہیں کہ ونڈوز 10 میں ویب براﺅزنگ کے لیے ہمارے براﺅزر کا نیا برانڈ یا نیا نام کیا ہو، ہم انٹرنیٹ ایکسپلورر کو برقرار رکھیں گے مگر ہمارے پاس اب ایک نیا براﺅزر پراجیکٹ اسپارٹن بھی موجود ہے اور ہم اسے ایک نیا نام دینا چاہتے ہیں۔
اگرچہ مائیکروسافٹ انٹرنیٹ ایکسپلورر کو ختم کرنے جارہی ہے تاہم ایسا مکمل طور پر نہیں ہوگا اور یہ اداروں کے لیے کسی نہ کسی شکل میں موجود ہوگا تاہم ونڈوز 10 میں پراجیکٹ اسپارٹن صارفین کے لیے ویب کی دنیا میں رسائی کے لیے ڈیفالٹ براﺅزر ہوگا۔
اس نئے براﺅزر میں مائیکروسافٹ نے متعدد دلچسپ نئے فیچرز جیسے ریڈر موڈ، وائس اسسٹنٹ کورٹانا اور دیگر متعارف کرائے ہیں اور کمپنی کے خیال میں اسے ایک اچھے نام کے ساتھ متعارف کراکے گوگل کروم کو مسابقت کی جنگ میں پیچھے چھوڑا جاسکتا ہے۔
