اسلام آباد (این این آئی)انسدادِ دہشتگردی عدالت اسلام آباد نے جے یو آئی ف کے مفتی ابرار کے ناقابل ضمانت وارنٹ جاری کردیے۔
پولیس ذرائع کے مطابق عدالتی حکم پر مفتی ابرار کی گرفتاری کے لیے چھاپے مارے جارہے ہیں،مفتی ابرار کے خلاف درج مقدمے میں انسدادِ دہشتگردی ایکٹ کی دفعہ 7 بھی شامل کردی گئی ہے۔
پولیس ذرائع کے مطابق جے یو آئی کے کارکنوں نے 7 نومبر کو بغیر اجازت فاروق اعظم مسجد کے قریب اجتماع کیا، سڑک بلاک کی۔ پولیس کے روکنے پر پولیس اہلکاروں پر پتھرا کیا، سرکاری گاڑیوں کی توڑ پھوڑ کی اور سرکاری امور میں رکاوٹ ڈالی۔ اس مقدمے میں مفتی ابرار اور قاری افتخار سمیت 200 سے زائد افراد نامزد ہیں۔ پولیس کے مطابق مسجد فاروقِ اعظم میں مفتی ابرار کے وارنٹ کی تعمیل کروا دی گئی ہے۔



















































