اسلام آباد (نیوز ڈیسک) پنجاب حکومت نے 27 ستمبر کے ممکنہ احتجاج کے پیش نظر وفاق سے بعض علاقوں میں موبائل اور انٹرنیٹ سروسز معطل یا محدود کرنے کی درخواست کردی۔

ذرائع کے مطابق محکمہ داخلہ پنجاب نے وفاقی حکومت کو خط ارسال کیا ہے، جس میں 27 ستمبر سے موبائل فون اور انٹرنیٹ سروسز بند کرنے یا سگنلز کی صلاحیت کم کرنے کی استدعا کی گئی ہے۔ذرائع کا کہنا ہے کہ پنجاب حکومت نے ضلع راولپنڈی اور اٹک کے مخصوص علاقوں میں بھی موبائل و انٹرنیٹ سروسز کی بندش سے متعلق درخواست کی ہے۔حکومتی ذرائع کے مطابق یہ اقدام امن و امان کی ممکنہ صورتحال کو مدنظر رکھتے ہوئے تجویز کیا گیا ہے۔

دوسری جانب تحریک انصاف کی جانب سے 27 ستمبر کو اسلام آباد کی طرف لانگ مارچ کا اعلان کیا جاچکا ہے۔ مارچ کے پیش نظر اسلام آباد آنے والے مختلف راستوں پر کنٹینرز رکھے جا رہے ہیں، جبکہ پنجاب بھر میں دفعہ 144 بھی نافذ کردی گئی ہے۔واضح رہے کہ موبائل اور انٹرنیٹ سروسز کی بندش یا سگنلز میں کمی سے متعلق حتمی فیصلہ وفاقی حکام کی جانب سے کیا جائے گا۔