کراچی(این این آئی)ناظم آباد کے نجی اسپتال میں خاتون کی مبینہ ڈیلیوری کے معاملے میں مزید رپورٹس سامنے آگئیں، جن کے مطابق خاتون کے حمل کی تصدیق نہیں ہوسکی۔
پولیس سرجن ڈاکٹر سمعیہ سید کے مطابق متاثرہ خاتون کے نجی اسپتال سے کرائے گئے خون کے ٹیسٹ کی رپورٹ میں بھی حمل کی تصدیق نہیں ہوئی، جبکہ خاتون کی ایم آر آئی رپورٹ بھی موصول ہوگئی ہے۔انہوں نے بتایا کہ ایم آر آئی آپریشن کے دوران لگائے گئے چیرے کی گہرائی کا جائزہ لینے کے لیے کرائی گئی تھی۔ رپورٹ کے مطابق آپریشن کے دوران جلد اور دیگر ابتدائی تہوں کو کاٹا گیا تاہم پٹھوں کو کاٹے جانے کے شواہد نہیں ملے۔پولیس سرجن کے مطابق آپریشن کے دوران ساتوں تہوں کو کاٹنے کی نوبت نہیں آئی۔
ابتدائی تہیں کاٹنے کے بعد ڈاکٹروں کو اندازہ ہوگیا تھا کہ آپریشن کے مقام پر حمل کا حجم موجود نہیں، جس کے باعث مزید گہرائی میں چیرا نہیں لگایا گیا۔
