اسلام آباد (نیوز ڈیسک) نیشنل ڈیٹا بیس اینڈ رجسٹریشن اتھارٹی (نادرا) نے اسلحہ لائسنس سے متعلق خدمات حاصل کرنے والے شہریوں کے لیے اہم اطلاع جاری کردی ہے۔

نادرا کے مطابق شہریوں کو سہولت فراہم کرنے کے لیے وفاقی وزارت داخلہ سے جاری ہونے والے اسلحہ لائسنس سے متعلق تمام سروسز کی فراہمی کے مقام میں تبدیلی کردی گئی ہے۔

اب اسلحہ لائسنس کی خدمات نادرا میگا سینٹر بلیو ایریا اور نادرا ریجنل ہیڈ آفس جی-10 اسلام آباد کے بجائے پاکستان آسان خدمت سینٹر جی-9 اسلام آباد میں دستیاب ہوں گی۔

اتھارٹی نے شہریوں کو ہدایت کی ہے کہ اسلحہ لائسنس سے متعلق کسی بھی سروس یا درخواست کے لیے پاکستان آسان خدمت سینٹر میں قائم نادرا دفتر سے رجوع کریں۔

پاکستان آسان خدمت سینٹر میں مختلف سرکاری اداروں کی متعدد سہولیات ایک ہی جگہ فراہم کی جاتی ہیں، جن میں پولیس اور پاسپورٹ سمیت دیگر متعلقہ محکموں کی خدمات بھی شامل ہیں۔

نادرا کے مطابق پاکستان آسان خدمت سینٹر کے اوقات کار ہفتے کے ساتوں دن صبح 8 بجے سے رات 8 بجے تک ہیں، جس کے دوران شہری اسلحہ لائسنس سے متعلق خدمات حاصل کرسکتے ہیں۔