لاہور (این این آئی) پی ٹی آئی رہنما عبداللہ طاہر کے قتل کیس میں پولیس کو اہم پیش رفت حاصل ہوئی ہے،

پولیس نے مقتول کے ڈرائیور اصغر کو حراست میں لے کر اس کا موبائل فون بھی قبضے میں لے لیا۔پولیس ذرائع کے مطابق دورانِ تفتیش ڈرائیور اصغر کی جانب سے عبداللہ طاہر کی لوکیشن اور نقل و حرکت ایک خاتون ٹک ٹاکر کو فراہم کیے جانے کا انکشاف ہوا ہے۔ ڈرائیور اصغر اور خاتون ٹک ٹاکر کی بالمشافہ تفتیش بھی کی گئی۔ذرائع کا کہنا ہے کہ پولیس نے واردات سے قبل موقع پر مبینہ ریکی کرنے والے ملزم اور قتل میں استعمال ہونے والی گاڑی رینٹ پر دلوانے والے افراد کو بھی حراست میں لے لیا ہے۔

پولیس ذرائع کے مطابق قتل میں سہولت کاری کا کردار ادا کرنے والے خواتین سمیت 5ملزمان اس وقت حراست میں ہیں جبکہ مرکزی شوٹر اور اس کے دو ساتھی تاحال مفرور ہیں۔پولیس نے ملزمان سے مزید تفتیش شروع کر دی ہے اور مرکزی شوٹرز کی گرفتاری کے لیے کارروائیاں جاری ہیں۔