اسلام آباد (نیوز ڈ یسک) پنجاب کے شہر پتوکی میں دوستی کے رشتے کو شرمندہ کرنے والا ایک مبینہ واقعہ سامنے آیا ہے،

جہاں ایک شہری نے اپنے دوست پر اغوا کرکے اس کا گردہ نکالنے اور فروخت کرنے کا الزام عائد کیا ہے۔ پولیس نے مقدمہ درج کرکے تحقیقات کا آغاز کر دیا ہے۔پولیس کے مطابق پتوکی کے علاقے پرانی منڈی کے رہائشی رحمت نے شکایت درج کرائی کہ اس کے دوست رضا نے کاروبار میں شراکت کا جھانسہ دے کر اسے اپنے ساتھ بلایا۔ الزام ہے کہ بعد ازاں ملزم نے اپنے دو ساتھیوں کے ساتھ مل کر اسے اغوا کر لیا اور راولپنڈی منتقل کر دیا۔متاثرہ شہری کا کہنا ہے کہ سفر کے دوران اسے ایک مشروب پلایا گیا، جس میں مبینہ طور پر نشہ آور چیز شامل تھی۔ اس کے بعد وہ بے ہوش ہو گیا۔ ہوش آنے پر اسے شدید تکلیف محسوس ہوئی، جس سے معلوم ہوا کہ اس کا آپریشن کیا جا چکا ہے۔رحمت کے مطابق بعد میں طبی معائنے اور الٹراساؤنڈ رپورٹ سے انکشاف ہوا کہ اس کا دایاں گردہ موجود نہیں تھا، جس کے بعد اس نے پولیس سے رجوع کیا۔

پولیس حکام کے مطابق متاثرہ شخص کی درخواست پر 12 جولائی کو مقدمہ درج کیا گیا۔ تفتیش کے دوران مرکزی ملزم رضا اور اس کے مبینہ سہولت کاروں کی نشاندہی ہوئی، جن کے خلاف قانونی کارروائی جاری ہے۔حکام کا کہنا ہے کہ کیس کے تمام پہلوؤں کا باریک بینی سے جائزہ لیا جا رہا ہے، جبکہ شواہد کی بنیاد پر مزید پیش رفت متوقع ہے۔