اسلام آباد (نیوز ڈیسک)نیشنل ڈیٹا بیس اینڈ رجسٹریشن اتھارٹی (نادرا) نے سعودی عرب میں مقیم پاکستانی شہریوں کے لیے اہم اطلاع جاری کرتے ہوئے بتایا ہے کہ مدینہ منورہ میں قائم نادرا آفس دوبارہ فعال کیا جا رہا ہے۔
نادرا کے ترجمان کے مطابق حج سیزن کے دوران سعودی حکام کی ہدایات کے پیش نظر مدینہ منورہ دفتر کی خدمات عارضی طور پر معطل کر دی گئی تھیں، تاہم اب یہ پابندی ختم ہونے کے بعد 12 جولائی 2026، بروز اتوار سے تمام معمول کی خدمات دوبارہ فراہم کی جائیں گی۔
اعلامیے میں کہا گیا ہے کہ مدینہ منورہ اور اس کے گردونواح میں رہنے والے پاکستانی شہری مقررہ تاریخ سے شناختی دستاویزات اور دیگر نادرا سہولیات سے دوبارہ استفادہ کر سکیں گے۔
یاد رہے کہ نادرا نے رواں سال 12 اپریل 2026 کو حج انتظامات کے باعث پاکستانی قونصلیٹ جنرل جدہ کی ہدایات کے مطابق مدینہ منورہ آفس کی سرگرمیاں عارضی طور پر بند کر دی تھیں، جنہیں حج سیزن کے اختتام کے بعد اب بحال کر دیا گیا ہے۔
