اسلام آباد (نیوز ڈیسک)نیشنل ڈیزاسٹر مینجمنٹ اتھارٹی (این ڈی ایم اے) اور محکمہ موسمیات نے رواں سال کے مون سون سیزن سے متعلق تازہ پیشگوئی جاری کرتے ہوئے خبردار کیا ہے کہ اگرچہ مجموعی بارشیں معمول سے کم رہنے کا امکان ہے، تاہم جہاں بارش ہوگی وہاں اس کی شدت غیر معمولی ہو سکتی ہے۔

این ڈی ایم اے کی موسمیاتی ماہر ڈاکٹر بشریٰ خالد کے مطابق عالمی موسمیاتی رجحان ایل نینو (El Niño) اس سال بھی پاکستان کے مون سون نظام پر اثر انداز ہو رہا ہے۔ ان کا کہنا تھا کہ ایل نینو کی موجودگی عموماً مون سون بارشوں کی مقدار کم کر دیتی ہے اور بارش کے سلسلے بھی نسبتاً کمزور رہتے ہیں۔

انہوں نے وضاحت کی کہ اس وقت شمال مشرق کی جانب سے آنے والا مون سون سسٹم مطلوبہ نمی کے بغیر پاکستان میں داخل ہو رہا ہے، جس کے باعث طویل اور مسلسل بارشوں کے امکانات محدود ہیں۔ تاہم بعض علاقوں میں مختصر وقت کے دوران تیز بارش، آندھی اور گرج چمک کے واقعات پیش آ سکتے ہیں۔

ادھر محکمہ موسمیات نے مون سون کے تیسرے مرحلے کی پیشگوئی کرتے ہوئے بتایا ہے کہ بحیرہ عرب سے مرطوب ہوائیں ملک کی جانب بڑھ رہی ہیں، جس کے اثرات آئندہ چند روز میں مختلف علاقوں میں محسوس کیے جائیں گے۔

محکمہ موسمیات کے مطابق 11 اور 12 جولائی کے دوران پنجاب، خیبرپختونخوا، آزاد کشمیر، گلگت بلتستان اور اسلام آباد میں بارش کا امکان موجود ہے، جبکہ سندھ کے بعض علاقوں میں 12 اور 13 جولائی کے دوران بارش متوقع ہے۔

ماہرین نے شہریوں کو مشورہ دیا ہے کہ موسلادھار بارش، تیز ہواؤں اور شہری علاقوں میں ممکنہ اربن فلڈنگ کے خدشات کے پیش نظر احتیاطی تدابیر اختیار کریں، غیر ضروری سفر سے گریز کریں اور متعلقہ اداروں کی جاری کردہ ہدایات پر عمل کریں۔