اسلام آباد (نیوز ڈیسک) راولپنڈی کے اڈیالہ روڈ پر جاری پاکستان تحریک انصاف (پی ٹی آئی) کے دھرنے کے دوران کارکنوں کے دو گروپوں کے درمیان تلخ کلامی جھگڑے میں بدل گئی، جس کے نتیجے میں ایک کارکن کو مبینہ طور پر تشدد کا نشانہ بنایا گیا جبکہ موقع پر موجود خواتین نے معاملہ ٹھنڈا کرانے کی کوشش کی۔
اطلاعات کے مطابق کشیدگی اس وقت پیدا ہوئی جب کارکنوں کا ایک گروپ علیمہ خان سے ملاقات کے لیے آگے بڑھا، تاہم دوسرے گروپ نے انہیں آگے جانے سے روک دیا۔ اس پر دونوں جانب سے دھکم پیل اور ہاتھا پائی شروع ہوگئی، جس کے دوران بعض کارکنوں کے کپڑے بھی پھٹ گئے۔
عینی شاہدین کے مطابق ابتدائی جھگڑے کے بعد دھرنے میں شریک خواتین اور دیگر افراد نے مداخلت کر کے فریقین کو الگ کیا، لیکن کچھ دیر بعد دونوں گروپ ایک بار پھر آمنے سامنے آ گئے۔
بعد ازاں دو کارکنوں کے درمیان دوبارہ جھگڑا شدت اختیار کر گیا، جہاں ایک دوسرے پر مکے برسائے گئے۔ اس دوران ایک کارکن کی عینک بھی ٹوٹ گئی جبکہ ہاتھا پائی کے نتیجے میں کپڑے پھاڑنے کے واقعات بھی پیش آئے۔
پولیس ذرائع کے مطابق اڈیالہ جیل کے فیکٹری ناکہ کے قریب جاری دھرنے سے دو افراد کو حراست میں لیا گیا ہے۔ حکام کا کہنا ہے کہ دونوں کارکنوں پر سرِعام مبینہ طور پر منشیات استعمال کرنے کا الزام ہے، جنہیں مزید کارروائی کے لیے اڈیالہ چوکی منتقل کر دیا گیا ہے۔
پی ٹی آئی احتجاج کے دوران لڑائیاں معمول بنتی جا رہی ہیں،آج ایک گروپ علیمہ خانم سے ملنے آیا تھا دوسرے نے روک لیا اور لڑائی شروع ہو گئی،ایکدوسرے پر ہاتھ صاف کرنے کے ساتھ کپڑے بھی پھاڑ دیئے گئے،خواتین کی موجودگی میں گالیاں دی گئیں،اس سے قبل بھی پی ٹی آئی کے پی کے دو گروپس میں لڑائی… pic.twitter.com/VkGBTTem93
— Israr Ahmed Rajpoot (@ia_rajpoot) July 7, 2026
