اسلام آباد (نیوز ڈ یسک)راولاکوٹ میں احتجاجی مظاہروں کے دوران ایک پولیس اہلکار پر مبینہ حملے کا واقعہ پیش آیا، جس میں وہ شدید زخمی ہوگیا۔
پولیس ذرائع کے مطابق اسلام آباد پولیس کے اے ایس آئی جاوید اپنی والدہ کے انتقال کی اطلاع ملنے کے بعد واپس جا رہے تھے کہ راستے میں مظاہرین نے انہیں روک لیا۔
ذرائع کا کہنا ہے کہ تلاشی کے دوران اہلکار کی جیب سے پولیس شناختی کارڈ برآمد ہوا، جس کے بعد مشتعل افراد نے ان پر حملہ کر دیا۔
پولیس حکام کے مطابق تشدد کے نتیجے میں اے ایس آئی جاوید کی دونوں ٹانگیں بری طرح متاثر ہوئیں اور انہیں فوری طبی امداد کے لیے کمبائنڈ ملٹری ہسپتال (سی ایم ایچ) منتقل کر دیا گیا۔
ذرائع نے بتایا کہ زخمی اہلکار اس وقت آزاد کشمیر میں خصوصی ڈیوٹی انجام دے رہے تھے۔ واقعے کے بعد سیکیورٹی اداروں نے صورتحال کا جائزہ لینا شروع کر دیا ہے جبکہ مزید تحقیقات بھی جاری ہیں۔
