اسلام آباد (نیوز ڈیسک) اسلام آباد کے آئی نائن سیکٹر میں غیر ملکی شہریت رکھنے والے ایک جوڑے کو اغوا کرنے کی کوشش کرنے والے تین ملزمان کو پولیس نے گرفتار کر لیا۔
پولیس حکام کے مطابق جمعہ کی شام موٹر سائیکلوں پر سوار تین افراد نے آئی نائن مرکز میں ایک گاڑی کو روک کر اس میں موجود میاں بیوی کو اسلحے کے زور پر یرغمال بنانے کی کوشش کی۔ ملزمان نے انہیں خوفزدہ اور ہراساں بھی کیا، تاہم متاثرہ افراد کی مزاحمت کے باعث وہ اغوا کی واردات میں کامیاب نہ ہو سکے۔پولیس کے مطابق ملزمان فرار ہونے سے قبل جوڑے سے نقد رقم، موبائل فونز اور دیگر اہم دستاویزات چھین کر لے گئے۔ واقعے کے بعد متاثرہ شخص کی درخواست پر تھانہ انڈسٹریل ایریا میں مقدمہ درج کیا گیا اور فوری کارروائی کرتے ہوئے تینوں ملزمان کو گرفتار کر لیا گیا۔گرفتار افراد کی شناخت محسن، عمر اور معاویہ کے ناموں سے ہوئی ہے۔ ابتدائی معلومات کے مطابق ملزم محسن سابق پولیس اہلکار بھی رہ چکا ہے۔
پولیس کا کہنا ہے کہ واردات کا شکار ہونے والے میاں بیوی میں شوہر امریکی جبکہ خاتون برطانوی شہریت رکھتی ہیں۔ واقعے کے بعد علاقے میں تشویش کی فضا پائی جاتی ہے جبکہ قانون نافذ کرنے والے اداروں نے ملزمان سے مزید تفتیش کا آغاز کر دیا ہے تاکہ واردات کے تمام پہلوؤں کو سامنے لایا جا سکے۔
