لاہور (نیوز ڈیسک): پنجاب کے مختلف علاقوں سمیت صوبائی دارالحکومت لاہور میں موسم خوشگوار ہونے کا امکان ہے، جہاں گرد آلود ہواؤں اور بارش لانے والا کمزور موسمی نظام فعال ہے۔ گزشتہ روز ہونے والی بارش کے باعث درجہ حرارت میں نمایاں کمی دیکھی گئی اور گرمی کی شدت میں بھی کچھ حد تک کمی آئی۔

محکمہ موسمیات کے مطابق لاہور میں آج کم سے کم درجہ حرارت 26 ڈگری سینٹی گریڈ ریکارڈ کیا گیا، جبکہ زیادہ سے زیادہ درجہ حرارت 34 ڈگری تک پہنچنے کی توقع ہے۔ ماہرین موسمیات نے پیش گوئی کی ہے کہ آج بھی لاہور اور پنجاب کے مختلف شہروں میں تیز ہواؤں کے ساتھ بارش ہو سکتی ہے۔

دوسری جانب صوبائی ڈیزاسٹر مینجمنٹ اتھارٹی (پی ڈی ایم اے) نے آندھی، بارش اور ممکنہ ژالہ باری کے حوالے سے الرٹ جاری کر دیا ہے۔ ادارے کے مطابق راولپنڈی، مری، گلیات، اٹک، جہلم، چکوال، بھکر، لیہ، فیصل آباد، جھنگ، اوکاڑہ، گوجرانوالہ، حافظ آباد اور وزیر آباد سمیت متعدد اضلاع میں بارش کے امکانات موجود ہیں۔

الرٹ میں مزید بتایا گیا ہے کہ سرگودھا، میانوالی، شیخوپورہ، خوشاب، ڈیرہ غازی خان، بہاولپور، بہاولنگر، ملتان، خانیوال، لودھراں، مظفرگڑھ، راجن پور، رحیم یار خان، کوٹ ادو اور منڈی بہاؤالدین میں بھی بارش متوقع ہے۔

پی ڈی ایم اے کے مطابق لاہور، سیالکوٹ، نارووال، فیصل آباد، جھنگ اور قریبی علاقوں میں بھی موسلادھار بارش یا گرج چمک کے ساتھ بارش ہونے کا امکان موجود ہے۔

ڈی جی پی ڈی ایم اے نے کہا کہ وزیراعلیٰ پنجاب Maryam Nawaz کی ہدایات پر تمام کمشنرز اور ڈپٹی کمشنرز کو پیشگی اقدامات کے لیے الرٹ کر دیا گیا ہے۔ لاہور میں متوقع بارش کے پیش نظر واسا حکام نے بھی اپنے عملے کو فیلڈ میں متحرک رہنے کی ہدایت جاری کر دی ہے۔

شہریوں کو مشورہ دیا گیا ہے کہ گرج چمک کے دوران کھلے مقامات سے گریز کریں اور آسمانی بجلی سے محفوظ رہنے کے لیے احتیاطی تدابیر اختیار کریں۔ اسی طرح گرد آلود ہواؤں اور تیز آندھی کی صورت میں غیر ضروری سفر سے اجتناب کیا جائے۔

پی ڈی ایم اے نے کسانوں کو موسمی صورتحال کے مطابق حفاظتی اقدامات کرنے اور شمالی علاقوں کا رخ کرنے والے سیاحوں کو بھی محتاط رہنے کی ہدایت کی ہے تاکہ کسی ناخوشگوار صورتحال سے بچا جا سکے۔