اسلام آباد (نیوز ڈیسک) لاہور کے علاقے ڈیفنس میں ایک اپارٹمنٹ سے نوجوان خاتون کی لاش برآمد ہونے کے معاملے میں پولیس نے مقتولہ کے قریبی دوست کے خلاف قتل کا مقدمہ درج کر لیا ہے۔
پولیس حکام کے مطابق فضا نامی خاتون نے مذکورہ اپارٹمنٹ خود بک کروایا تھا، جہاں وہ اپنے دوست وقار یاسین کے ساتھ موجود تھی۔ ابتدائی تفتیش میں معلوم ہوا ہے کہ دونوں رات بھر اپارٹمنٹ میں رہے۔
تحقیقات کے دوران سامنے آیا کہ خاتون کی طبیعت بگڑنے پر وقار یاسین نے ریسکیو اہلکاروں سے رابطہ کیا، تاہم جب فضا کی موت کی تصدیق ہوئی تو وہ موقع سے فرار ہو گیا۔
پولیس نے فوری کارروائی کرتے ہوئے مشتبہ شخص کا تعاقب کیا اور بعد ازاں اسے حراست میں لے لیا۔ حکام کا کہنا ہے کہ واقعے میں قتل کے شبے کو نظرانداز نہیں کیا جا سکتا، اسی بنیاد پر مقدمہ درج کرکے مزید تحقیقات شروع کر دی گئی ہیں۔
پولیس کے مطابق خاتون کی موت کی اصل وجہ اور واقعے کی مکمل حقیقت پوسٹ مارٹم رپورٹ موصول ہونے کے بعد ہی واضح ہو سکے گی، جبکہ مختلف پہلوؤں سے تحقیقات کا سلسلہ جاری ہے۔
