روہڑی(این این آئی)درگاہ بال مبارک کے قریب دریائے سندھ میں نہاتے ہوئے ایک ہی گھر کے 3 بچے ڈوب گئے

جس سے علاقے میں افسوسناک صورتحال پیدا ہو گئی۔ریسکیو ذرائع کے مطابق بچے گرمی کے باعث دریا میں نہانے گئے تھے کہ اس دوران اچانک گہرے پانی میں چلے گئے اور ڈوب گئے۔ڈوبنے والوں میں سے ایک 5 سالہ بچے کی لاش نکال لی گئی ہے جبکہ ایک بچی اور ایک بچے کی تلاش کیلئے ریسکیو آپریشن جاری ہے۔ریسکیو ٹیمیں اور مقامی غوطہ خور لاپتہ بچوں کی تلاش میں مصروف ہیں، ڈوبنے والے تینوں بچے آپس میں بہن بھائی ہیں جس کے باعث علاقے میں افسوس اور سوگ کی فضا ہے۔واقعے کے بعد اہل علاقہ کی بڑی تعداد جائے وقوعہ پر جمع ہو گئی جبکہ ریسکیو ادارے امدادی کارروائیوں کو مزید تیز کر رہے ہیں۔