لاہور (نیوز ڈیسک) لاہور سمیت پنجاب کے مختلف شہروں میں زلزلے کے جھٹکے محسوس کیے گئے،
جس کے باعث شہریوں میں خوف و ہراس پھیل گیا اور متعدد افراد احتیاطاً گھروں اور عمارتوں سے باہر نکل آئے۔ اطلاعات کے مطابق شیخوپورہ، مریدکے اور کامونکی کے علاقوں میں بھی زمین لرزنے کی کیفیت محسوس کی گئی۔ زلزلے کے جھٹکوں کے بعد کئی مقامات پر لوگ کلمہ طیبہ کا ورد کرتے ہوئے کھلے مقامات کی جانب چلے گئے۔
زلزلہ پیما حکام کے مطابق زلزلے کی شدت 4.9 ریکارڈ کی گئی، جبکہ اس کا مرکز کشمیر اور بھارتی سرحد سے ملحقہ خطہ تھا۔ ماہرین نے بتایا کہ زلزلہ زمین کے اندر تقریباً 18 کلومیٹر گہرائی میں آیا۔
یاد رہے کہ اس سے قبل مئی کے مہینے میں بھی پنجاب کے مختلف علاقوں، جن میں ملکوال، پھالیہ، دیپالپور، حجرہ شاہ مقیم اور پھول نگر شامل ہیں، زلزلے کے جھٹکے محسوس کیے گئے تھے۔ اسی دوران منڈی بہاؤالدین اور اس کے نواحی علاقوں میں بھی لرزش ریکارڈ کی گئی تھی جس سے شہریوں میں تشویش پھیل گئی تھی۔
تاحال کسی جانی یا مالی نقصان کی اطلاع موصول نہیں ہوئی، تاہم متعلقہ ادارے صورتحال پر نظر رکھے ہوئے ہیں۔
