کراچی(این این آئی)سندھ پولیس نے ڈرگ ڈیلر انمول پنکی کیس سے متعلق سوشل میڈیا پر گردش کرنے والی مبینہ فہرست کو جعلی اور بے بنیاد قرار دیتے ہوئے
عوام سے غیر مصدقہ معلومات پر یقین نہ کرنے کی اپیل کی ہے۔ترجمان سندھ پولیس کی جانب سے جاری بیان میں کہا گیا ہے کہ انمول پنکی کیس کے حوالے سے مختلف سوشل میڈیا پلیٹ فارمز پر ایک فہرست گردش کر رہی ہے جسے بعض عناصر حقائق کے طور پر پیش کرنے کی کوشش کر رہے ہیں، تاہم یہ تمام معلومات من گھڑت اور حقیقت کے منافی ہیں۔پولیس ترجمان کے مطابق جھوٹی خبریں اور جعلی فہرستیں پھیلا کر نہ صرف عوام کو گمراہ کیا جا رہا ہے بلکہ جاری تفتیشی عمل کو بھی متاثر کرنے کی کوشش کی جا رہی ہے۔
انہوں نے واضح کیا کہ کیس کی تحقیقات قانون کے مطابق جاری ہیں اور کسی بھی غیر مصدقہ خبر یا افواہ کو مستند نہ سمجھا جائے۔بیان میں مزید کہا گیا کہ سندھ پولیس جھوٹی اور بے بنیاد خبریں پھیلانے والوں کے خلاف قانونی کارروائی کا حق محفوظ رکھتی ہے، جبکہ سوشل میڈیا پر کردار کشی اور غلط معلومات پھیلانے والے عناصر سے سختی سے نمٹا جائے گا۔ترجمان سندھ پولیس نے شہریوں سے اپیل کی کہ وہ ذمہ داری کا مظاہرہ کریں اور صرف مستند ذرائع سے جاری کردہ معلومات پر اعتماد کریں تاکہ افواہوں اور غلط خبروں کی روک تھام ممکن بنائی جا سکے۔
