کراچی(این این آئی)کراچی میں قائد آباد سے گرفتار ہونے والی نرگس عرف ملکہ کے حوالے سے پولیس نے اہم انکشافات کیے ہیں

ملزمہ دراصل ایک ریٹائرڈ پولیس اہلکار کی اہلیہ نکلی اور وہ اپنے خاندان کے ساتھ مبینہ طور پر منشیات کا نیٹ ورک چلا رہی تھی جو جیل تک پھیلا ہوا تھا۔تفتیشی ذرائع کے مطابق ملزمہ نرگس کا بیٹا طاہر جیل پولیس سے رابطے میں تھا جبکہ جیل پولیس کے ذریعے منشیات جیل تک سپلائی کی جاتی رہی ملزمہ منشیات پوش علاقوں میں بھی سپلائی کرتی تھی۔ذرائع نے بتایا کہ ملزمہ نرگس کا شوہر وکیل خان ریٹائرڈ پولیس اہلکار ہے جو پہلے گرفتار ہوچکا ہے ملزمہ کے شوہر کو قانون نافذ کرنیوالے اداروں نے شاہراہ بھٹو سے منشیات سمیت گرفتار کیا تھا شوہر کی گرفتاری کے بعد ماں نے منشیات کا نیٹ ورک بیٹے کے ذریعے چلایا۔

تفتیشی ذرائع نے مزید بتایا کہ ملزمان کو منشیات کوئٹہ سے فضل ولی نامی شخص لاکر دیتا تھا کوئٹہ سے آنیوالی منشیات ملزمان اپنے گھر میں چھپا کر رکھتے تھے منشیات فروش خاندان نے ضلع ملیر میں 3 گھر لے رکھے تھے۔ذرائع کے مطابق نرگس کے شوہر، ریٹائرڈ اہلکار وکیل خان پہلے بھی منشیات کے مقدمے میں گرفتار ہو چکے ہیں اور اب نیٹ ورک کے مزید کرداروں کی شناخت اور گرفتاری کے لیے تحقیقات جاری ہیں۔