اسلام آباد(این این آئی)اسلام آباد میں پولیس اہلکاروں کی جانب سے ایک غریب بائیکیا رائیڈر پر تشدد اور رقم چھیننے کا واقعہ سامنے آیا ہے۔

تفصیلات کے مطابق واقعہ تھانہ ترنول کی حدود جی 15میں پیش آیا، جہاں محمدیاسر نامی نوجوان رات تقریباً 11بجے اپنی موٹرسائیکل کا ٹائر پنچر ہونے کے باعث سڑک کنارے رکا ہوا تھا۔متاثرہ نوجوان کے مطابق اسی دوران اسلام آباد پولیس کے چار اہلکار وہاں پہنچے اور بغیر کسی وجہ کے اسے ہراساں کرنا شروع کر دیا۔ اہلکاروں نے اسے تشدد کا نشانہ بنایا،گالم گلوچ کی اور تلاشی کے دوران اس کی جیب سے تین ہزار روپے نکال لیے۔نوجوان نے دعویٰ کیا کہ رقم لینے کے بعد اہلکار موقع سے فرار ہوگئے جبکہ وہ خوف و ہراس کا شکار ہو گیا۔ واقعے کے بعد نوجوان نے وفاقی پولیس کے رویے پر تشویش کا اظہار کرتے ہوئے اعلیٰ حکام سے نوٹس لینے کا مطالبہ کیا ہے۔

تاحال پولیس حکام کی جانب سے واقعے پر باضابطہ موقف سامنے نہیں آیا، تاہم ذرائع کا کہنا ہے کہ معاملے کی جانچ پڑتال کیے جانے کا امکان ہے۔