لاہور (این این آئی) لاہور ایئرپورٹ پر پی آئی اے ملازمین کے مبینہ طور پر شراب سمگلنگ میں ملوث ہونے کا انکشاف سامنے آیا ہے،

کسٹمز نے 80سے زائد شراب کی بوتلیں قبضہ میں لے لیں، کسٹمز حکام کی درخواست پر اے ایس ایف نے متعلقہ ملازمین کے انٹری پاس بھی ضبط کر لئے ۔ذرائع کے مطابق پی آئی اے کا عملہ ابوظہبی سے آنے والی پرواز ای وائے 288پر سفر کرنے والے مسافر کو خصوصی پروٹوکول فراہم کر رہا تھا۔اس مسافر کو پروٹوکول کی آڑ میں نکلوانے کی کوشش کی مگر کسٹم آفیسر نے سامان کلیئر نہیں کیا اور بوتلیں ضبط کر لیں جس پر مسافر موقع سے فرار ہوگیا، صفدر گوندل اور ساتھی بھی ایئرپورٹ سے نکل گئے۔کسٹمز حکام نے کارروائی کرتے ہوئے مسافر کے قبضے سے لاکھوں روپے مالیت کی 80سے زائد شراب کی بوتلیں برآمد کر لیں۔ذرائع کا کہنا ہے کہ کسٹمز کی کارروائی کے دوران پی آئی اے کے متعلقہ ملازمین موقع سے فرار ہو گئے، کسٹمز حکام کی درخواست پر اے ایس ایف نے متعلقہ ملازمین کے انٹری پاس بھی ضبط کر لئے ہیں۔پی آئی اے کے ترجمان عبداللہ خان کا کہنا ہے کہ واقعے سے متعلق آگاہ کر دیا گیا ہے اور معاملے کی انکوائری جاری ہے،

ذمہ داروں کے خلاف سخت کارروائی عمل میں لائی جائے گی۔ذرائع کے مطابق حکام نے مبینہ طور پر ملوث افسران اور عملے کی معطلی کے احکامات جاری کر دیئے ہیں جبکہ گریڈ 5کے ملازم صفدر گوندل سمیت دیگر اہلکاروں کو معطل کر دیا گیا ہے۔