اسلام آباد (نیوزڈیسک) راولپنڈی میں معمولی مالی تنازع جان لیوا ثابت ہوا، جہاں فائرنگ کے نتیجے میں دو افراد اپنی جان سے ہاتھ دھو بیٹھے۔

پولیس کے مطابق یہ افسوسناک واقعہ تھانہ دھمیال کی حدود میں واقع پیر مہر علی شاہ ٹاؤن میں پیش آیا۔ ابتدائی تحقیقات کے مطابق جھگڑا صرف 1300 روپے کے لین دین پر شروع ہوا جو بعد ازاں شدت اختیار کرتے ہوئے فائرنگ تک جا پہنچا۔فائرنگ کے نتیجے میں دو افراد موقع پر ہی جاں بحق ہوگئے۔ پولیس نے ایک مقتول کی شناخت 25 سالہ سراج کے نام سے کی ہے جبکہ دوسرے شخص کی شناخت سے متعلق معلومات جمع کی جا رہی ہیں۔

واقعے کے بعد لاشوں کو قانونی کارروائی اور پوسٹ مارٹم کے لیے اسپتال منتقل کر دیا گیا ہے۔ پولیس کا کہنا ہے کہ ملزم فرار ہو گیا ہے اور اس کی گرفتاری کے لیے چھاپے مارے جا رہے ہیں۔