لاہور (این این آئی)پنجاب میں پرائیویٹ سکولوں نے گرمی کی چھٹیوں میں تعلیمی نقصان کو پورا کرنے کے لیے سمر کیمپ لگانے کی اجازت مانگ لی ۔

سکول مالکان کا کہنا ہے کہ حکومت انہیں گرمی کی چھٹیوں کے دوران ارلی مارننگ سمر کیمپ لگانے کی اجازت دے تاکہ طلبہ کی پڑھائی کا تسلسل برقرار رکھا جا سکے۔ان کے مطابق صبح 7سے 10بجے تک سمر کیمپ کا انعقاد کیا جائے تاکہ گرمی کی شدت سے بھی بچا جا سکے۔سکول انتظامیہ کا کہنا ہے کہ حالیہ غیر اعلانیہ چھٹیوں کی وجہ سے نصابی سرگرمیوں کا دورانیہ متاثر ہوا ہے، جس سے طلبہ کوسمر کیمپ سے لرننگ لاس کم کرنے میں خاطر خواہ فائدہ ہوگا۔ ان کا کہنا ہے کہ سمر کیمپ کے ذریعے اس تعلیمی نقصان کو کافی حد تک کم کیا جا سکتا ہے۔محکمہ سکول ایجوکیشن کے ذرائع کے مطابق ہر سال ایک ماہ کے لیے سمر کیمپ لگانے کی اجازت دی جاتی رہی ہے تاہم اس سال حتمی اجازت وزیر اعلیٰ کی منظوری کے بعد دی جائے گی۔