اسلام آباد (نیوز ڈیسک) اینٹی کرپشن عدالت نے شہباز شریف کی بیٹی رابعہ عمران اور داماد علی عمران یوسف کو صاف پانی کمپنی کیس سے بری کر دیا ہے۔

یہ فیصلہ اینٹی کرپشن کورٹ کے جج جاوید اقبال وڑائچ نے درخواستوں کی سماعت کے بعد سنایا۔ عدالت نے قرار دیا کہ جب مقدمہ قابلِ پیروی ہی نہیں تو بریت کی درخواستوں کی ضرورت بھی باقی نہیں رہتی۔عدالت کے مطابق رابعہ عمران اور علی عمران یوسف کے خلاف کیس میں کسی قسم کے ٹھوس شواہد سامنے نہیں آئے، اس لیے انہیں مقدمے سے خارج کیا جاتا ہے۔ ان پر الزام تھا کہ انہوں نے اپنی عمارت صاف پانی کمپنی کو کرائے پر دی، جو نوعیت کے اعتبار سے سول معاملہ تھا۔

عدالت کو پیش کی گئی تفتیشی رپورٹ میں بھی اینٹی کرپشن ڈیپارٹمنٹ نے مؤقف اختیار کیا کہ دونوں افراد بے قصور ہیں اور ان کے خلاف کیس آگے بڑھانے کے لیے مواد موجود نہیں۔یاد رہے کہ اس کیس میں پہلے دیگر ملزمان کو بھی 31 جنوری 2022 کو احتساب عدالت سے ریلیف مل چکا تھا، کیونکہ نیب شواہد فراہم کرنے میں ناکام رہا تھا۔ بعد ازاں قانون میں تبدیلی کے بعد کیس اینٹی کرپشن کے حوالے کیا گیا، تاہم وہاں بھی الزامات ثابت نہ ہو سکے۔

سماعت کے دوران سرکاری وکیل نے بھی عدالت کو آگاہ کیا کہ صاف پانی کمپنی کیس میں مذکورہ میاں بیوی کا کوئی کردار سامنے نہیں آیا۔