اسلام آباد (این این آئی)اوورسیز پاکستانی خاتون بائیکر نے برطانیہ سے پاکستان تک جرات مندانہ سفر مکمل کرلیا۔
سرگودھا سے تعلق رکھنے والی خاتون بائیکر نے بتایا کہ دوران سفر خواتین بائیکرز اور ایسوسی ایشنز نے بھرپور تعاون کیا۔ انہوں نے بتایا کہ بائیک کی مرمت کا مکمل سامان اور سیٹلائٹ فون کیساتھ سفر کا جامع پلان بنایا تھا،روایتی جرمنی روٹ کی بجائے اٹلی اور یونان کا راستہ اختیار کیا لیکن ایران کے قریب جنگی صورتحال کے باعث واپس جانا پڑا اور روٹ تبدیل کرنا پڑا۔انہوں نے کہا کہ متبادل راستہ اختیار کرکے کراچی پہنچی تو ایک بائیکر نے بائیک تحفے میں دی۔خاتون بائیکر نے بتایا کہ روزانہ صبح سویرے سفر کا آغاز کرتی تھی تاکہ محفوظ انداز میں منزل طے ہو، سندھ میں معمولی حادثہ پیش آیا لیکن سفر جاری رکھا۔انہوں نے کہا کہ کراچی اور سندھ میں عوام کی جانب سے بھرپور محبت اور پھولوں سے استقبال کیا گیا، لاہور پہنچ کر اپنے تاریخی بائیک سفر کا کامیاب اختتام کیا۔
خاتون بائیکر نے بتایا کہ لاہور کی بائیکرز نے بیرونِ ملک سفر کے حوالے سے رہنمائی کیلئے رابطہ کیا ہے، مشکلات کے باوجود فیصلہ کیا کہ لڑکیوں کو بھی تنہا بائیکنگ کا حوصلہ دینا ہوگا ۔انہوں نے کہا کہ بائیکرز کی زندگی اور تجربات پر مبنی کتاب بھی تحریر کرچکی ہوں، اگست اور ستمبر میں غیر ملکی بائیکرز کو پاکستان لانے کا منصوبہ ہے۔خاتون بائیکر نے کہا کہ میری ذاتی بائیک الجیریا میں موجود ہے، آئندہ مزید بین الاقوامی سفر کا ارادہ ہے۔
