اسلام آباد (نیوز ڈیسک) پولیس نے چوہڑ چوک کے قریب ایک مشتبہ شخص کو حراست میں لے لیا ہے، جس نے دورانِ تفتیش خود کو بھارت کا شہری ظاہر کیا۔
تفصیلات کے مطابق راولپنڈی کے تھانہ ویسٹریج کی پولیس گشت کے دوران اس شخص تک پہنچی۔ پولیس رپورٹ کے مطابق اہلکاروں نے اسے دھمیال کی سمت جاتے دیکھا، تاہم پولیس کو دیکھتے ہی اس نے واپس مڑنے کی کوشش کی جس پر اسے روک کر تلاشی لی گئی۔پوچھ گچھ کے دوران ملزم اپنی شناخت کے حوالے سے کوئی مستند دستاویز پیش نہ کر سکا۔ بعد ازاں اس نے اپنا نام دلیر مشتاق ولد مشتاق احمد صوفی بتایا اور دعویٰ کیا کہ وہ بھارتی شہری ہے۔
پولیس کے مطابق گرفتار شخص کے پاس سے 1750 روپے نقد اور دو بال پین برآمد ہوئے ہیں۔ واقعے کے بعد ملزم کے خلاف فارن ایکٹ کے تحت مقدمہ درج کر کے مزید تحقیقات شروع کر دی گئی ہیں۔
