لاہور (نیوز ڈیسک) صوبائی دارالحکومت لاہور میں کاؤنٹر ٹیررازم ڈیپارٹمنٹ (سی ٹی ڈی) نے ایک یوٹیوبر کو مبینہ طور پر کالعدم تنظیم کے لیے بھرتی مہم چلانے کے الزام میں گرفتار کر لیا ہے، تاہم اہلِ خانہ نے ان الزامات کو مسترد کر دیا ہے۔

BBC Urdu کی رپورٹ کے مطابق گرفتار شخص کی شناخت محمد سعد بن ریاض کے نام سے ہوئی ہے، جو ایک یوٹیوب چینل سے وابستہ بتائے جاتے ہیں۔ سی ٹی ڈی اہلکار توفیق اسلم کی مدعیت میں درج مقدمے میں مؤقف اختیار کیا گیا کہ 27 اپریل کی صبح مال روڈ کے جی پی او چوک پر کارروائی کے دوران مخبر نے اطلاع دی کہ مسجد حنفیہ غوثیہ میں ایک مشتبہ شخص موجود ہے جو مبینہ طور پر کالعدم تنظیم القاعدہ کے لیے لوگوں کو آمادہ کر رہا ہے اور ممنوعہ لٹریچر تقسیم کر رہا ہے۔

پولیس رپورٹ کے مطابق چھاپے کے دوران ایک شخص کو گرفتار کیا گیا جس نے اپنا نام محمد سعد بن ریاض بتایا۔ ایف آئی آر میں دعویٰ کیا گیا کہ اس کے بیگ سے پانچ ایسی کتابیں برآمد ہوئیں جنہیں ممنوعہ مواد قرار دیا گیا ہے، جبکہ ایک ممبرشپ کارڈ بھی قبضے میں لیا گیا۔

دوسری جانب عائشہ قیوم نے سوشل میڈیا پلیٹ فارم X پر جاری بیان میں کہا کہ پیر کی صبح تقریباً ساڑھے تین بجے 12 سے 13 نقاب پوش مسلح افراد ان کے گھر میں داخل ہوئے اور ان کے شوہر کو اپنے ساتھ لے گئے۔ ان کا کہنا تھا کہ قانونی دباؤ بڑھنے کے بعد سی ٹی ڈی نے بعد ازاں ایک بے بنیاد مقدمہ درج کیا۔

اہلِ خانہ کا دعویٰ ہے کہ محمد سعد بن ریاض ماضی میں ریاستی اداروں کے ساتھ بھی کام کر چکے ہیں۔ ان سے منسلک ادارے نے بھی ایک ویڈیو جاری کر کے گرفتاری کے خلاف قانونی کارروائی کا اعلان کیا ہے۔

رپورٹ میں کہا گیا ہے کہ BBC Urdu سی ٹی ڈی اور اہلِ خانہ، دونوں جانب سے کیے گئے دعوؤں کی آزادانہ طور پر تصدیق نہیں کر سکا۔