اسلام آباد (این این آئی)ملک بھر میں 8سے 16گھنٹے کی طویل لوڈشیڈنگ کے باعث شہری گرمی میں شدید اذیت کا شکار ہوگئے۔

ذرائع کے مطابق ملک میں بجلی کا شارٹ فال 6ہزار 500میگا واٹ تک پہنچ گیا ہے، اس وقت ملک میں بجلی کی مجموعی پیداوار 15ہزار 400میگا واٹ ہے جبکہ بجلی کی طلب 22 ہزار میگا واٹ تک ریکارڈ کی جا رہی ہے۔ذرائع نے بتایا کہ مختلف ذرائع سے بجلی کی پیداوار میں پن بجلی ایک ہزار 500میگا واٹ فراہم کر رہی ہے جب کہ تھرمل ذرائع سے 9ہزار 250میگا واٹ بجلی پیدا ہو رہی ہے۔اسی طرح سولر پاور پلانٹس 400 میگا واٹ بجلی پیدا کر رہے ہیں اور بیگاس سے بجلی کی پیداوار 200میگا واٹ تک ہے۔علاوہ ازیں ونڈ پاور پلانٹس سے ایک ہزار 200 میگا واٹ بجلی حاصل ہو رہی ہے جب کہ نیوکلیئر پاور پلانٹس کی پیداوار 2ہزار 850میگا واٹ تک پہنچ چکی ہے، جس کے باوجود ملک بھر میں لوڈشیڈنگ کا دورانیہ برقرار ہے۔