مکو آ نہ(این این آئی)فیصل آباد میں گھریلو لڑائی جھگڑے پر مشتعل شخص نے فائرنگ کرکے بیوی اور 2 بیٹیوں کو قتل کردیا،

آر پی او نے واقعہ کا نوٹس لیکر رپورٹ طلب کرلی، پولیس نے ملزم کی خلاف قانونی کارروائی شروع کردی۔ ترجمان فیصل آباد پولیس طارق جٹ نے بتایا کہ تھانہ کھرڑیانوالہ کے علاقہ علی گارڈن نزد مائی مستانہ مکوآنہ میں تہرے قتل کا واقعہ پیش آیا۔ملزم جاوید نے گھریلو لڑائی جھگڑے کی بنا پر اپنی بیوی 37 سالہ صائمہ اور دو بچیوں 13 سالہ عائشہ اور 17 سالہ ام حبیبہ کو فائرنگ کر کے قتل کر دیا اور فرار ہو گیا۔ اطلاع ملنے پر پولیس حکام موقع پر پہنچ گئے۔ پولیس نے نعشیں تحویل میں لیکر پوسٹ مارٹم کیلئے ہسپتال منتقل کر دیں۔ پولیس نے جائے وقوعہ سے شواہد اکٹھے کرکے قانونی کارروائی شروع کردی۔فرار ملزم کی گرفتاری کیلئے ٹیمیں تے شکیل دیدی گئی ہیں۔

ترجمان نے بتایا کہ سی پی او فیصل آباد صاحبزادہ بلال عمر نے واقعہ کا فوری نوٹس لے لیا۔ایس پی جڑانوالہ ڈویژن سے واقع کی فوری رپورٹ طلب کر لی اور ملزم کی گرفتاری کے لیے ٹیم تشکیل دے دی گئی۔ایس پی جڑانوالہ کی سربراہی میں پولیس ٹیم نے واقعہ کی تحقیقات شروع کر دیں۔ترجمان ریجنل پولیس رضوان بھٹی نے بتایا کہ آر پی او فیصل آباد سہیل اختر سکھیرا کا تھانہ کھرڑیانوالہ کے علاقہ میں تہرے قتل کے واقعہ کا نوٹس لیکر سی پی او فیصل آباد سے وقوعہ کے حوالے سے رپورٹ طلب کرلی۔