لاہور( این این آئی)ہنجروال کے علاقے میں ڈیڑھ سالہ بچے کے اغوا ء کا معمہ پولیس نے کامیابی سے حل کر لیا،
افسوسناک واقعے میں بچے کا اپنا حقیقی تایا ہی مرکزی ملزم نکلا جسے اس کے ساتھی سمیت گرفتار کر لیا گیا ہے۔پولیس کے مطابق بچے احمد نواز کے والد نے بیٹے کے اغوا ء کا مقدمہ تھانہ ہنجروال میں درج کروایا تھا جس کے بعد انچارج انویسٹی گیشن محمد جاوید نے اپنی ٹیم کے ہمراہ فوری کارروائی شروع کی۔ جدید تفتیشی طریقوں اور مسلسل کوششوں کے نتیجے میں ملزمان کا سراغ لگا لیا گیا۔تحقیقات کے دوران یہ بات سامنے آئی کہ مرکزی ملزم، جو بچے کا تایا ہے، اپنے ساتھی کے ساتھ مل کر بچے کو اغوا ء کر کے دیپالپور لے گیا ۔ پولیس حکام کے مطابق ملزم کا ارادہ بچے کو ایک ایسی خاتون کے حوالے کرنے کا تھا جس کی اپنی کوئی اولاد نہیں تھی۔
مزید انکشاف ہوا کہ مرکزی ملزم اس خاتون سے شادی کرنا چاہتا تھا اور اسی مقصد کے تحت اس نے یہ گھنائونا منصوبہ بنایا۔پولیس نے بروقت کارروائی کرتے ہوئے دونوں ملزمان کو گرفتار کر لیا اور بچے کو بحفاظت بازیاب کرا لیا۔ بچے کی بحفاظت واپسی پر اہل خانہ نے انویسٹی گیشن پولیس ٹیم کا شکریہ ادا کیا۔
