اسلام آباد (نیوزڈیسک)غالب مارکیٹ پولیس نے سی سی ٹی وی فوٹیج کی مدد سے ایک منظم گروہ کا سراغ لگاتے ہوئے شاہدرہ کے علاقے سے چار افراد کو حراست میں لے لیا ہے۔
پولیس ترجمان کے مطابق ڈی آئی جی آپریشنز کی جانب سے ایس ایچ او غالب مارکیٹ کو فوری کارروائی کی ہدایت دی گئی تھی، جس کے نتیجے میں گاڑیوں کے سائیڈ شیشے چوری کرنے والے ایک خاندانی گروہ کو گرفتار کیا گیا۔تحقیقات میں انکشاف ہوا کہ اس گروہ کی قیادت مرکزی ملزم کر رہا تھا، جس نے اپنے بیٹوں اور ایک قریبی رشتہ دار کے ساتھ مل کر یہ نیٹ ورک قائم کیا ہوا تھا۔پولیس کے مطابق ملزمان رات کے وقت شہر کے مختلف علاقوں میں کھڑی گاڑیوں کو نشانہ بناتے اور ان کے قیمتی سائیڈ شیشے چوری کر کے فرار ہو جاتے تھے۔ سی سی ٹی وی ویڈیوز میں بھی انہیں واردات کے بعد آسانی سے نکلتے ہوئے دیکھا گیا۔ایس پی آپریشنز کا کہنا ہے کہ ملزمان چوری شدہ شیشے فروخت کرنے کے لیے بلال گنج مارکیٹ میں اپنی ایک دکان استعمال کرتے تھے، جہاں وہ یہ سامان کم قیمت پر فروخت کر دیتے تھے۔
پولیس نے کارروائی کے دوران ملزمان کے قبضے سے چوری شدہ شیشوں کے چار تھیلے اور واردات میں استعمال ہونے والی دو موٹر سائیکلیں برآمد کر لی ہیں، جبکہ مزید تفتیش جاری ہے۔
