اسلام آباد (این این آئی) جنگ بندی میں کامیابی کے بعد 70فیصد عالمی رائے پاکستان کے حق میں مثبت ہوگئی اور تھینک یو پاکستان عالمی سطح پر ٹرینڈ کرنے لگا۔

تفصیلات کے مطابق مشرقِ وسطی میں جاری کشیدگی کے خاتمے اور کامیاب جنگ بندی کے بعد عالمی رائے عامہ میں پاکستان کے حوالے سے ایک بڑا اور مثبت یوٹرن دیکھنے میں آ ا ہے۔آئی پی ایس او ایس کی تازہ ترین رپورٹ کے مطابق، پاکستان کے ثالثی کردار کے باعث 70 فیصد عالمی رائے اب پاکستان کے حق میں مثبت ہو چکی ہے۔پاکستان کی اس غیر معمولی سفارتی کامیابی کو دنیا بھر میں سراہا جا رہا ہے۔

سوشل میڈیا پر ”Thank You Pakistan ”کے ہیش ٹیگ عالمی سطح پر ٹرینڈ کر رہے ہیں، دنیا بھر کے صارفین نے پاکستان کو ممکنہ عالمی جنگ کا راستہ روکنے کا کریڈٹ دیا ۔عالمی ماہرین کے مطابق پاکستان نے اپنی متوازن خارجہ پالیسی کے ذریعے ثابت کر دیا کہ وہ خطے میں امن کا سب سے بڑا داعی ہے۔رپورٹ میں بتایا گیا کہ جہاں پاکستان کی تعریف ہو رہی ہے، وہیں بھارتی وزیرِ خارجہ کے پاکستان مخالف منفی بیانات پر بھی عالمی سطح پر بحث چھڑ گئی ہے اور بھارت کا منفی موقف بوکھلاہٹ کا شکار نظر آ رہا ہے۔ عالمی میڈیا اب بھارت کے بجائے پاکستان کے امن پسندانہ کردار کو زیادہ اہمیت دے رہا ہے۔پاکستان کے اندر بھی شہریوں نے اپنی سیاسی اور عسکری قیادت پر بھرپور اعتماد کا اظہار کیا ہے۔رپورٹ کے مطابق وزیراعظم شہباز شریف اور فیلڈ مارشل عاصم منیر کی قیادت کو اس نازک وقت میں درست فیصلے کرنے پر ملک گیر اور عالمی سطح پر نمایاں پذیرائی مل رہی ہے۔جنگ بندی کے اعلان کے بعد پوری دنیا کی توجہ اب پاکستان پر مرکوز ہے، جسے ایک ایسے ملک کے طور پر دیکھا جا رہا ہے جو پیچیدہ ترین بین الاقوامی تنازعات کو حل کرنے کی صلاحیت رکھتا ہے۔