سوات(این این آئی)سوات کی تحصیل بحرین کے علاقے شینکو مدین میں غیرت کے نام پر دل دہلا دینے والا واقعہ پیش آیا،

جہاں ایک بھائی نے اپنے دو ساتھیوں کے ہمراہ اپنی جواں سال بہن اور اس کے مبینہ آشنا کو بے دردی سے قتل کر دیا۔ ڈی ایس پی مدین سرکل جہانزیب خان کے مطابق ملزم محمد الیاس ولد بخت منیر نے اپنے ساتھیوں نجیب اللہ ولد زڑہ ور خان اور طارق جمیل ولد حبیب اللہ کے ہمراہ اپنے گھر میں موجود اپنی بہن مسما (س)دختر بخت منیر اور مبینہ آشنا الطاف حسین ولد سہراب پر کلہاڑی کے پے در پے وار کیے، جس کے نتیجے میں دونوں موقع پر ہی جاں بحق ہو گئے۔ اطلاع ملنے پر مدین پولیس فوری طور پر جائے وقوعہ پر پہنچی، لاشوں کو تحویل میں لے کر پوسٹ مارٹم کے لیے سول اسپتال مدین منتقل کر دیا گیاہے۔ پولیس نے بروقت کارروائی کرتے ہوئے تینوں ملزمان کو گرفتار کر لیا ہے۔ واقعہ کے خلاف تھانہ مدین میں دفعہ 302اور غیرت کے نام پر قتل سے متعلق دفعہ 311کے تحت مقدمہ درج کر کے مزید تفتیش شروع کر دی گئی ہے۔ پولیس کے مطابق واقعہ کے تمام پہلوں کا باریک بینی سے جائزہ لیا جا رہا ہے۔