اسلام آباد/لاہور( این این آئی)حکومت نے سمارٹ لاک ڈائون سے متعلق نوٹیفکیشن کو جعلی قرار دیتے ہوئے عوام کو خبردار کیا ہے کہ وہ غیر مصدقہ معلومات شیئر کرنے سے گریز کریں۔
وزارتِ اطلاعات کے مطابق وائرل ہونے والی دستاویز جس میں لاک ڈائون اور دیگر پابندیوں سے متعلق ہدایات درج ہیں، مستند نہیں ۔ حکام نے واضح کیا کہ اس قسم کی جھوٹی خبروں سے معاشرے میں بے چینی اور غلط فہمیاں پیدا ہو سکتی ہیں۔حکومت نے شہریوں پر زور دیا ہے کہ وہ ذمہ داری کا مظاہرہ کریں اور صرف مستند ذرائع سے حاصل کردہ معلومات پر ہی اعتماد کریں۔بیان میں کہا گیا کہ فیک خبروں اور جھوٹی پوسٹس کو شیئر کرنے سے گریز کیا جائے کیونکہ ایک غیر ذمہ دارانہ شیئر بھی عوام میں غلط تاثر پھیلانے کا سبب بن سکتی ہے۔وزارتِ اطلاعات نے عوام سے اپیل کی کہ وہ سوشل میڈیا کے استعمال میں احتیاط برتیں اور قومی مفاد میں درست معلومات کے فروغ میں اپنا کردار ادا کریں۔
