اسلام آباد (نیوز ڈیسک): سینیٹ کی قائمہ کمیٹی برائے داخلہ نے ایک اہم حکومتی مسودۂ قانون کی منظوری دے دی ہے، جس میں شناختی کارڈ سے متعلق نئے اختیارات شامل کیے گئے ہیں۔

یہ بل وزیر قانون اعظم نذیر تارڑ نے وزیر داخلہ کی ہدایت پر ایوان میں پیش کیا تھا۔ کمیٹی سے منظوری کے بعد اسے اب سینیٹ کے آئندہ اجلاس میں منظوری کے لیے پیش کیا جائے گا۔مجوزہ ترمیم کے مطابق نادرا کو یہ اختیار حاصل ہوگا کہ وہ کسی بھی شہری کا شناختی کارڈ 60 دن تک عارضی طور پر بلاک کر سکے۔وزارت داخلہ کے حکام کا مؤقف ہے کہ شناختی کارڈ ایک نہایت حساس اور قومی سلامتی سے جڑی دستاویز ہے، جس کے غلط استعمال سے سیکیورٹی اور معیشت دونوں کو نقصان پہنچ سکتا ہے۔مزید کہا گیا کہ واضح قانونی فریم ورک نہ ہونے کے باعث نادرا کو عملی مشکلات کا سامنا رہتا ہے، جبکہ بعض عناصر جان بوجھ کر قانونی کارروائی سے بچنے کے لیے مختلف حیلے بہانے اختیار کرتے ہیں اور ادارے کے ساتھ تعاون نہیں کرتے۔

حکام کے مطابق اس ترمیم کے ذریعے نادرا کو زیادہ مؤثر اختیارات دیے جائیں گے تاکہ وہ مشکوک سرگرمیوں میں ملوث افراد کے شناختی کارڈ بروقت بلاک کر سکے اور نظام کو محفوظ بنایا جا سکے۔