راولپنڈی (این این آئی)راولپنڈی کے علاقے گوہڑہ میں شادی کی تقریب میں ہوائی فائرنگ کرنے والی دلہن کی ضمانت منظور کر لی گئی۔

علاقہ مجسٹریٹ گوجر خان آفتاب احمد نے دلہن کی ضمانت منظور کی، عدالت نے ملزمہ کو 50 ہزار روپے کے مچلکے جمع کرانے کا حکم بھی دیا۔دلہن کو گرفتاری کے بعد گزشتہ روز علاقہ مجسٹریٹ کی عدالت میں پیش کیا گیا تھا اور عدالت نے ملزمہ کو 14 روزہ جوڈیشل ریمانڈ پر جیل بھیج دیا تھا۔پولیس کے مطابق گرفتار لڑکی کی ایک ماہ قبل شادی ہوئی ہے، شادی کے بعد فائرنگ کی ویڈیو سامنے آنے پر قانونی کارروائی کی گئی۔پولیس کے مطابق پولیس جب ملزمان کی گرفتاری کے لیے پہنچی تو لڑکی کا شوہر فرار ہوگیا تھا۔پولیس کے مطابق پولیس نے پنجاب آرمز ترمیمی آرڈیننس 2015ء کے تحت مقدمہ درج کیا ہے۔