کراچی(این این آئی) محکمہ ڈیزاسٹر مینجمنٹ اتھارٹی و ری ہیبلیٹشن، سندھ کی جانب سے جاری کردہ اعلامیہ میں کہا گیا ہے کہ محکمہ موسمیات کی پیشگوئی کے مطابق مغربی ہواؤں کا ایک سلسلہ جو کہ 24 مارچ کی شام/رات سے داخل ہوا تھا وہ 27 مارچ کی رات سے شدت اختیار کر سکتا ہے، جبکہ یہ سلسلہ 31 مارچ تک برقرار رہنے کا امکان ہے۔

تفصیلات کے مطابق بارش/گرج چمک چند ایک مقامات پر ژالہ باری کراچی، ٹھٹھہ، بدین، دادو، سکھر، جیکب آباد اور لاڑکانہ میں 26 مارچ کو متوقع ہے جبکہ 28 اور 29 مارچ کو وقفے وقفے سے بارش کا امکان ہے۔محکمہ ڈیزاسٹر مینجمنٹ اتھارٹی و ری ہیبلیٹشن، سندھ کی جانب سے جاری کردہ اعلامیہ کے مطابق آندھی، ژالہ باری اور بجلی گرنے سے کمزور ڈھانچوں بجلی کے کھمبے، بل بورڈز، سولر پینلز وغیرہ اور کھڑی فصلوں کو نقصان پہنچ سکتا ہے۔ سیاحوں اور مسافروں کو ہدایت کی جاتی ہے کہ محتاط رہیں اور غیر ضروری سفر سے گریز کریں۔

کسانوں کو موجودہ موسمی حالات کے مطابق اپنی سرگرمیوں کا انتظام کرنے کا مشورہ دیا جاتا ہے جبکہ دن کے وقت درجہ حرارت میں کمی کا امکان ہے۔ تمام متعلقہ حکام کو ہدایت کی جاتی ہے کہ وہ الرٹ رہیں اور پیشگوئی کے دوران کسی بھی ناخوشگوار صورتحال سے بچنے کے لیے ضروری اقدامات کریں۔ مزید یہ کہ تمام متعلقہ ڈپٹی کمشنرز / چیئرمین ڈی ڈی ایم ایز اور دیگر متعلقہ ادارے/اسٹیک ہولڈرز ضروری حفاظتی اقدامات کریں۔