لاہور (این این آئی)سی سی ڈی پنجاب میں ایک ہزار نئی بھرتیوں کا فیصلہ کیا گیا ہے اور اس سلسلے میں 491ملین روپے کے فنڈز بھی منظور کرلیے گئے

صوبائی کابینہ نے سی سی ڈی میں نفری کی شدید کمی کو پورا کرنے کے لیے مختلف کیڈرز میں ایک ہزار افسران اور اہلکاروں کی فوری بھرتی کی منظوری دے دی ہے۔یہ فیصلہ صوبے بھر میں خطرناک ڈاکوئوں، مجرموں اور اشتہاریوں کی سرکوبی کے لیے کیا گیا ہے۔سرکاری مراسلے کے مطابق سی سی ڈی کا محکمہ مارچ 2025ء میں قائم کیا گیا تھا، جس کے لیے 7486افسران و اہلکاروں کی نفری منظور شدہ ہے، تاہم اس وقت صرف 3904اہلکار خدمات انجام دے رہے ہیں اور 3582اسامیاں خالی ہیں۔صوبے کو اسلحہ سے پاک کرنے میں سی سی ڈی کا کردار انتہائی اہم رہا ہے، جس کے قیام کے بعد ڈکیتی کی وارداتوں میں 55فیصد اور قتل کے واقعات میں 45فیصد تک واضح کمی ریکارڈ کی گئی ہے۔مراسلے میں واضح کیا گیا ہے کہ پنجاب پولیس کی نفری نئے بننے والے محکمے پیرا کو بھجوائی گئی ہے، جس کی وجہ سے پولیس سے سی سی ڈی کو مزید نفری فراہم کرنا ممکن نہیں رہا۔نفری کی کمی دور کرنے کے لیے آئی جی پنجاب نے ایک ہزار کانسٹیبلز اور ڈرائیور کانسٹیبلز کی بھرتی کی سمری حکومت کو بھجوائی تھی۔ جس پر کابینہ نے نئی سیٹوں کی باقاعدہ منظوری دے دی ہے۔

منظوری کے مطابق سی سی ڈی میں 8ایس پی جنرل ایگزیکٹیو کیڈر، 3ایس پی لیگل کیڈر، 19ڈی ایس پی جنرل ایگزیکٹیو کیڈر اور 10ڈی ایس پی لیگل کیڈر کے افسران بھرتی کیے جائیں گے۔اس کے علاوہ 51انسپکٹر جنرل ایگزیکٹیو کیڈر، 141سب انسپکٹر، 173اے ایس آئی، 35ہیڈ کانسٹیبل، 100ڈرائیور کانسٹیبل اور 460کانسٹیبلز کی بھرتی کا عمل بھی اس منصوبے کا حصہ ہے۔حکومت نے ان بھرتیوں اور انتظامی امور کے لیے رواں مالی سال 2025/26کے سپلیمنٹری بجٹ میں 491ملین روپے کے فنڈز جاری کرنے کی بھی باقاعدہ منظوری دے دی ہے۔