اسلام آباد (نیوز ڈیسک)قومی ایئرلائن پی آئی اے کا ایک مسافر طیارہ دبئی کے قریب الفجیرہ ایئرپورٹ پر لینڈنگ کے دوران ایک بڑے حادثے سے بال بال بچ گیا،

جب اسی دوران قریبی نیول ہیڈکوارٹر پر میزائل حملہ کیا گیا۔میڈیا رپورٹس کے مطابق پرواز پی کے 175 صبح تقریباً 6 بجے الفجیرہ ایئرپورٹ پر اتری۔ اس طیارے میں 123 مسافروں کے ساتھ عملے کے 8 افراد بھی موجود تھے۔ لینڈنگ کے فوراً بعد ہونے والے حملے کے باعث علاقے میں دھواں پھیل گیا، جس سے طیارے میں سوار افراد میں خوف و ہراس پیدا ہو گیا۔ذرائع کے مطابق اسلام آباد سے آنے والی پی آئی اے کی دو پروازیں، پی کے 173 اور پی کے 175، اسی ایئرپورٹ پر اتری تھیں۔ ترجمان پی آئی اے کا کہنا ہے کہ صورتحال کو جلد قابو میں لے لیا گیا، تاہم سکیورٹی خدشات کے باعث واپسی کی پروازوں میں کچھ تاخیر پیش آئی۔ بعد ازاں دونوں طیارے بحفاظت لاہور اور اسلام آباد پہنچ گئے۔

ترجمان نے مزید بتایا کہ موجودہ حالات کے پیش نظر دبئی اور ابوظبی کے لیے پروازوں کا آپریشن عارضی طور پر متبادل ایئرپورٹس منتقل کر دیا گیا ہے۔ اب دبئی جانے والی پروازیں الفجیرہ جبکہ ابوظبی کی پروازیں العین ایئرپورٹ سے چلائی جا رہی ہیں۔