لاہور (این این آئی)محکمہ موسمیات نے عید الفطر پر موسم کی صورتحال بارے پیش گوئی کر دی۔

محکمہ موسمیات نے بالائی علاقوں میں عید کے دنوں میں مطلع ابرآلود رہنے کی پیشگوئی کی ہے۔رپورٹ کے مطابق ملک میں 17مارچ کی شام، رات سے نیا مغربی سلسلہ داخل ہونے کا امکان ہے، 18سے 20مارچ تک ملک کے بیشتر علاقوں میں آندھی گرج چمک کے ساتھ بارش متوقع ہے۔محکمہ موسمیات کے مطابق بلوچستان کے مختلف اضلاع میں 17سے 20مارچ تک بارش اور بعض مقامات پر ژالہ باری کا امکان ہے، خیبرپختونخوا کے بالائی علاقوں میں بارش جبکہ پہاڑوں پر برفباری متوقع ہے۔رپورٹ کے مطابق پنجاب اور اسلام آباد میں 17مارچ کی رات سے 20مارچ تک وقفے وقفے سے بارش ہونے کا امکان ہے، مری، گلیات، راولپنڈی اور اسلام آباد میں آندھی اور ژالہ باری کا بھی امکان ہے۔محکمہ موسمیات کے مطابق سندھ کے مختلف شہروں میں 18اور 19مارچ کو بارش اور گرج چمک کی توقع ہے، گلگت بلتستان اور کشمیر میں بارش کے ساتھ پہاڑوں پر برفباری متوقع ہے۔

بالائی علاقوں میں لینڈ سلائیڈنگ کا خدشہ ہے، سیاحوں کو غیر ضروری سفر سے گریز کی ہدایت کی گئی ہے، آندھی اور ژالہ باری سے فصلوں کو نقصان پہنچنے کا خدشہ ہے، دن کے درجہ حرارت میں کمی متوقع ہے۔