اسلام آباد (نیوز ڈ یسک)ڈیفنس فیز تھری میں ڈکیتی کی ایک بڑی واردات پیش آئی جہاں مسلح افراد نے ایک گھر میں گھس کر کروڑوں روپے مالیت کے زیورات، نقدی اور قیمتی گھڑیاں لوٹ لیں۔
تھانہ ڈیفنس اے میں درج مقدمے کے مطابق مدعی عامر سعید اپنی فیملی کے ساتھ سحری کے لیے گلبرگ گئے ہوئے تھے۔ ایف آئی آر کے مطابق جب وہ صبح تقریباً 4 بج کر 20 منٹ پر گھر واپس پہنچے اور گیٹ کھولا تو چار نامعلوم مسلح افراد ان کے پیچھے گھر کے اندر داخل ہو گئے۔ملزمان نے گھر میں گھس کر تمام اہلِ خانہ کو اسلحے کے زور پر ٹی وی لاؤنج میں جمع کر کے یرغمال بنا لیا۔ اس دوران مزاحمت کرنے پر ملزمان نے گھر کے مالک کو تشدد کا نشانہ بھی بنایا۔ڈاکوؤں نے گھر کے مختلف کمروں اور الماریوں کی تلاشی لی اور قیمتی سامان اپنے ساتھ لے گئے۔ لوٹے گئے سامان میں رولیکس سمیت مختلف برانڈز کی سات مہنگی کلائی گھڑیاں، تقریباً 200 تولہ سونا، 20 تولہ ہیرے جڑے زیورات، 14 لاکھ روپے نقد اور 500 یو اے ای درہم شامل ہیں۔
ایف آئی آر میں بتایا گیا ہے کہ لوٹے گئے تمام سامان کی مجموعی مالیت تقریباً 19 کروڑ 4 لاکھ 35 ہزار روپے بنتی ہے۔
مدعی کے مطابق ملزمان کی عمریں تقریباً 27 سے 40 سال کے درمیان تھیں۔ ان میں سے دو افراد کے پاس رائفلیں جبکہ دیگر دو کے پاس پستول موجود تھے۔ واردات کے بعد ملزمان سفید رنگ کی ہونڈا سوک کار میں سوار ہو کر فرار ہو گئے۔
پولیس نے واقعے کا مقدمہ دفعہ 392 تعزیراتِ پاکستان کے تحت درج کر کے تفتیش شروع کر دی ہے جبکہ انویسٹی گیشن ٹیم ملزمان کی گرفتاری اور لوٹے گئے سامان کی بازیابی کے لیے کارروائی کر رہی ہے۔
