اسلام آباد (نیوز ڈیسک) وفاقی وزیر برائے ریلوے حنیف عباسی نے اعلان کیا ہے کہ بُلھے شاہ مسافر ٹرین کو دوبارہ چلانے کا فیصلہ کر لیا گیا ہے اور یہ سروس 28 مئی سے بحال ہو جائے گی۔
یہ اعلان اسپیکر پنجاب اسمبلی ملک احمد خان سے ملاقات کے دوران کیا گیا، جس میں بُلھے شاہ ٹرین کی بحالی کی درخواست پیش کی گئی تھی۔ وزیر ریلوے نے بتایا کہ مذکورہ ٹرین قصور سے پاکپتن تک اپنے سابقہ روٹ پر دوبارہ آپریشن شروع کرے گی۔حنیف عباسی کے مطابق یہ ٹرین 15 نومبر 2011 کو بند کر دی گئی تھی۔ اس کے روٹ میں قصور، عثمانوالہ، کنگن پور اور منڈی احمد آباد سمیت دیگر اسٹیشن شامل ہیں۔
ملاقات کے دوران قصور میں 25 ایکڑ اراضی پر ایک پارک کے قیام کی منظوری بھی دی گئی۔ بتایا گیا ہے کہ یہ منصوبہ وزیراعظم شہباز شریف، اسپیکر پنجاب اسمبلی اور وزیر مملکت کے حلقے میں مکمل کیا جائے گا۔مزید برآں قصور ریلوے اسٹیشن کی خوبصورتی اور جدید خطوط پر اپ گریڈیشن کا بھی فیصلہ کیا گیا ہے تاکہ مسافروں کو بہتر سہولیات فراہم کی جا سکیں۔
