اسلام آباد (نیوز ڈ یسک)وفاقی دارالحکومت میں قائم کچی آبادیوں کے حوالے سے اہم پیش رفت سامنے آئی ہے۔
ذرائع کے مطابق چیئرمین سی ڈی اے کی سربراہی میں ہونے والے بورڈ اجلاس میں اس معاملے پر بڑے فیصلے کیے گئے۔رپورٹ کے مطابق اجلاس میں کیپٹل ٹیریٹری اربن ری جنریشن ریگولیشنز 2025 کی منظوری دے دی گئی۔ فیصلے کے تحت 31 دسمبر 2022 تک سروے میں شامل اور مقیم افراد کو ہی قانونی طور پر مستحق رہائشی تسلیم کیا جائے گا۔حکام نے منظور شدہ کچی آبادیوں کو باقاعدہ ریگولرائز کرنے اور مرحلہ وار اپ گریڈ کرنے کا فیصلہ بھی کیا ہے۔ اس مقصد کے لیے پلاننگ ونگ کا اسپیشل ڈائریکٹوریٹ دوبارہ سروے کرے گا، جس کی بنیاد پر ترقیاتی اور آبادکاری منصوبے ترتیب دیے جائیں گے۔ ان منصوبوں میں لے آؤٹ پلان کی تیاری، سڑکوں اور گلیوں کی تعمیر اور مرمت جیسے اقدامات شامل ہوں گے۔اجلاس کے دوران پنڈوریاں کے علاقے میں ماڈل قبرستان کے قیام کی تجویز کو بھی منظوری دے دی گئی۔
