اسلام آباد (نیوز ڈیسک) وفاقی دارالحکومت اسلام آباد، راولپنڈی اور خیبرپختونخوا کے مختلف علاقوں میں زلزلے کے جھٹکے محسوس کیے گئے جس سے شہریوں میں خوف و ہراس پھیل گیا۔
ابتدائی رپورٹس کے مطابق افطار کے قریب اچانک زمین لرزنے سے متعدد شہروں میں لوگ گھروں اور دفاتر سے باہر نکل آئے اور محفوظ مقامات کی طرف چلے گئے۔زلزلہ پیما مرکز کے مطابق زلزلے کی شدت 5.6 ریکارڈ کی گئی، اس کی گہرائی تقریباً 73 کلومیٹر تھی جبکہ مرکز افغانستان کے ہندوکش علاقے میں واقع تھا۔جھٹکے سوات، مردان، لوئر دیر، ملاکنڈ، چترال، خیبر، باڑہ، جمرود، لنڈی کوتل اور تیراہ سمیت کئی علاقوں میں محسوس کیے گئے، جبکہ سرگودھا اور اس کے نواحی علاقوں میں بھی زمین ہلنے کی اطلاعات ملیں۔زلزلے کے دوران شہری کلمہ طیبہ کا ورد کرتے ہوئے گھروں سے باہر نکل آئے۔ اب تک کسی جانی یا مالی نقصان کی اطلاع سامنے نہیں آئی۔
