اسلام آباد (نیوز ڈیسک) سیکٹر جی 16 میں واقع ایک رہائش گاہ میں گردوں کی مبینہ غیرقانونی ٹرانسپلانٹ سرجریوں کی اطلاع ملنے پر

قانون نافذ کرنے والے اداروں نے کارروائی کرتے ہوئے چھاپہ مارا اور کئی افراد کو حراست میں لے لیا۔ذرائع کے مطابق خفیہ اطلاع کی بنیاد پر کی گئی اس کارروائی کے دوران حکام کو معلوم ہوا کہ مذکورہ گھر میں غیر قانونی طور پر اعضا کی پیوندکاری کا عمل جاری تھا۔ چھاپے کے وقت وہاں متعدد افراد موجود تھے جو مبینہ طور پر اس غیرقانونی سرگرمی میں ملوث تھے، جبکہ تہہ خانے میں کئی مریض بھی پائے گئے۔اطلاعات کے مطابق اس مقام پر پیوندکاری کرنے والے ڈاکٹرز اور معاون عملے کو بھی گرفتار کر لیا گیا ہے۔ ایک خاتون مریضہ نے بتایا کہ اس جگہ اس کے خراب گردے نکال کر دوسرا گردہ لگایا گیا تھا۔ذرائع کا کہنا ہے کہ کچھ مریض ابھی بھی گھر کے زیرِ زمین حصے میں موجود ہیں، جبکہ پولیس نے عمارت کو گھیرے میں لے رکھا ہے اور مریضوں کو مختلف اسپتالوں میں منتقل کرنے کے لیے اقدامات زیر غور ہیں۔